噚日網上瘋傳一張民建聯李慧琼嘅Banner，呼籲狗主妥善清理狗屎，但李慧琼個名喺正「狗隻」兩個字下面，成個設計好似影射李慧琼係狗。正當網民笑橫額有語病時，李慧琼就喺facebook特別聲明，話張Banner係假嘅，佢哋已經報警備案。
已報警備案
條Banner噚日喺網上不斷被轉載，網民一係笑住話設計師係民主派，一係大鬧個排版好有問題，不過由於Banner用咗民建聯logo，而李慧琼個名同佢個頭像都係過去Banner用開嘅款式，所以無人懷疑真偽。
但係李慧琼噚日傍晚喺facebook表明，嗰張Banner並唔係佢辦事處整嘅。佢話由於過往都有人偽冒佢哋製作假橫額，所以今次有向警方備案。佢估計嚟緊9月選舉前，呢類惡搞陸續有嚟，又大嘆像真度高，好難教街坊分清楚。
