最近有爆料者開名指無綫劇集導演張永豪為求效果逼真，疑虐待「神獸天使」劉蔚萱，昨日更公開「受虐」片段，只見她被施以「膠袋笠頭」及「撼頭埋牆」，又被田雞威嚇，無奈硬食的她嚇得泣不成聲及作嘔，認真慘情！乍聞導演被質疑用暴力方法似不人道，監製李艷芳回應指因新演員演技幼嫩，力撐導演做法恰當。
無綫劇集經常被指是是但但，但其實亦有追求完美的導演，卻被指做法有時似過了火！最近有爆料者指劇集《心路GPS》導演張永豪（Gary）因不滿女演員劉蔚萱（Jenny）的表現，而出狠招「施虐」！爆料者昨日將兩段有關片段公開，只見導演Gary在第一段片中將膠袋笠實Jenny的頭，並將她「撼頭埋牆」；另一段片則見Gary將內有田雞的膠袋笠她的頭，務求要其受驚的逼真表情，Jenny「兩度受虐」果然淚如泉湧，被迫「親近」田雞時痛苦掙扎，其後更坐在地上喊爆作嘔，狀甚慘情！爆料者表示因看不過眼，決定將片段公開，他又指同場的李司棋曾作出勸喻，但導演叫她先稍作休息。
劇情需要唔難受
但據知撼牆及出動田雞均是劇情需要，該場戲講述飾演收數佬的楊潮凱向Jenny襲擊，令她流血入院，但因Jenny的喊戲及受驚反應未如理想，連累拍攝超時兩小時，令現場氣氛變僵，導演才心急望盡快達到效果。
疑受虐的神獸天使「嘴刁鵰」Jenny在藝員訓練班畢業不久即被器重，在《心》劇中飾演李司棋的哎吔新抱，戲份不少，有機會上位的她昨日在電話中受訪時雖默認片段真確，但力撐Gary試戲做法並無不妥：「我唔難受呀，仲好開心有呢個機會，大家都好錫我，同Gary冇心病，佢都係為部劇好啫！（太過火？）每個人有自己做法，我唔覺得委屈。（你喊得好慘！）咁出嚟效果咪好囉！」對於被指久久未達到要求，Jenny解釋一開始已成功喊出，只是要為不同角度繼續試戲。
監製稱做法無錯
《心》劇監製李艷芳則稱當時亦有在場，覺得Gary教戲並不過火，對此事被形容為「虐待事件」感莫名其妙：「我有睇住，始終新人演技比較嫩，咁教戲冇問題。（導演教戲有冇底線？）好難講一個標準守則，每個演員吸收力唔同，有時導演都要自己做一次，但會先同演員協調。」她表示沒有收過Jenny或有關人士投訴，至於會否徹查是否被偷拍，則交由公司負責處理。
Profile
劉蔚萱（Jenny Lau）
年齡：24歲
三圍：32C、22、33
入行經過：於加拿大讀大學，去年落選香港小姐，即被錢國偉監製欽點為電視節目《變身男女Chok Chok Chok》中的Chok之天使「棉花糖」，後來在《五覺大戰》擔任神獸天使「嘴刁鵰」而為人熟悉，最近更升呢拍劇。
