被屈「車震」過底線苟芸慧「喊」冤
新一代女神苟芸慧（苟姑娘）繼與視帝鄭嘉穎傳撻着後，再傳與謝天華在拍劇期間「車震」，苟姑娘前晚在慶功宴上強烈否認事件，更含屈爆喊直斥報道超越底線，連阿媽都開始不信任她！
華姐冠軍苟芸慧備受無綫力捧，今年連接六套劇，由閒角變身二線女主角，惟自她有份演出的《飛虎》和《怒火街頭2》播出後，開始爆出她向劇中男藝員獻媚，有傳視帝鄭嘉穎和蕭正楠都成裙下之臣！日前苟姑娘與謝天華合作新劇時，又傳出兩人上演一幕「車震」戲相當投入，種種負面消息令她壓力爆煲！前晚苟姑娘與馬國明、宣萱、王君馨及黃智雯等出席劇集《飛虎》慶功宴時，沒精打采兼眼腫腫，受訪時一聽到「車震」二字，即時爆喊，連在《飛》劇飾演其男友的梁烈唯上前安慰，她都請對方食檸檬，似乎深怕再惹緋聞！
緋聞不絕 我好辛苦
對於被指勾引人夫天華，苟姑娘一臉委屈兼激動流淚地說：「今朝媽咪喺加拿大打嚟問我，我都唔知咩事，冇睇本書，覺得好委屈！」她直言明白傳媒工作需要，但報道已超越其底線，她再度邊講邊喊：「令到我屋企人唔開心，我都好辛苦！我唔在乎人哋點睇我！（被屋企人鬧？）要解釋囉！令佢哋擔心，因為近期負面新聞一單接一單，佢哋擔心都好自然。（誤解咗你？）係呀！我覺得爸爸媽媽唔明我工作性質，開始唔信任我喇！我都唔知咩叫『車震』，係媽咪同我講先知。」男人勿近 趕走唯唯
為了令父母安心，苟姑娘表示會盡快安排家人來港居住，讓他們明白其工作。訪問期間，梁烈唯主動遞上暖水安慰她，並說：「萬大事有我！」然而她如驚弓之鳥般請唯唯食檸檬：「走啦！你過嚟我會好麻煩！」
苟姑娘直言不會因傳聞而放棄事業，但會與男對手保持距離，她說：「有少少驚，以前喺外國冇所謂，但做呢行就會避忌。（遲啲拍劇都好多男仔？）係呀！自己做好自己，都控制唔到！」
